تطبیق پروسه واکسیناسیون در معارف پکتیکا
وزارت معارف، پکتیکا: تزریق واکسین وایروس کرونا از طرف ریاست صحت عامه ولایت پکتیکا رسماً برای کارمندان ریاست معارف آنولایت آغاز گردید.
ریاست صحت عامه ولایت پکتیکا با هماهنگی ریاست معارف تعهد نمود که واکسین وایروس کرونا را برای ۵۰۰۰ تن معلمان و کارمندان معارف در مرکز و ولسوالیهای مربوطه آنولایت تهیه می نماید.
انجینر محراب الدین شفق رییس معارف ضمن تشکری از ریاست صحت عامه این ولایت، از راه اندازی تطبیق واکسین وایروس کرونا برای کارمندان معارف در این ولایت ابراز خرسندی نموده و از همه کارمندان ریاست معارف خواست که مرحله اول این واکسین را اخذ کرده و همچنان از رهنمودهای ریاست صحت عامه نیز پیروی کنند.
موصوف افزود که با تطبیق این واکسین، از یک طرف کارمندان معارف از خطر بیماری محافظت می شوند و از طرف دیگر از شیوع بیماری در مکاتب ، مراکز آموزشی و جامعه جلوگیری به عمل می آید.
