د لوګر د دوو ښوونځیو له زده کوونکو سره د قرطاسیې مرسته وشوه
د پوهنې وزارت_لوګر: د لوګر په مرکز پل علم پورې اړوند د دوو ښوونځیو پر ۱۳ سوه زده کوونکو د قرطاسیې مرسته وویشل شوه.
دغه مرسته په ولسي جرګه کې د لوګر د خلکو یوه استازي الحاج انجنیر محمد آصف نبي زي خیریه بنسټ د کلنګار جهادي او بي بي فاطمې له لېسو سره وکړه.
په دې مرسته کې د نوموړو دواړو ښوونځیو هر زده کوونکي ته یوه کتابچه، یو خود کار قلم، یو پنسل، یو پنسل پاک او یو قلم تراش ورکړل شول.
د نبي زي خیریه بنسټ دوه ورځې مخکې د لوګر د ښوونځیو پر سلو زرو زده کوونکو د قرطاسیې مرستې ویش پیل کړی.
د یادې مرستې له پیله تر اوسه د پنځو ښوونځیو پر ۳ زرو زده کوونکو د قرطاسیې مرسته ویشل شوې او پر نورو زده کوونکو به هم وویشل شي.
د لوګر د پوهنې رئیس عبدالوکیل کلیوال د ښوونځیو له زده کوونکو سره د الحاج انجنیر محمد آصف نبي زي کړې مرستې ستایلي.
د پوهنې رئیس په ملي شورا کې د لوګر له نورو وکیلانو غوښتي،چې د نبي زي په څېر د ښوونځیو له زده کوونکو سره مرستې وکړي.
ها خوا د نبي زي خیریه بنسټ وایي،چې د پل علم ښوونځیو له زده کوونکو سره تر مرستې وروسته دا لړۍ ولسوالیو ته هم وغځول شي.
