ننګرهار پوهنې ریاست د کتاب ټولونې په کمپاین کې سلګونه ټوکه کتابونه تر لاسه کړي دي
د پوهنې وزارت _ننګرهار: څه موده مخکې د ننګرهار پوهنې ریس حسیب الله شینواري په ښوونځیو کې د کتابونو دکمښت ستونزې ته په پام سره دپوهنې ریاست په مرکزي هسته او اړوندو پوهنې امریتونوکې ټولو کارکوونکو ته سپارښتنه وکړه چې دښوونځیو داړتیا وړ کتابونو په راټولولو کې مرسته وکړي او دا پیغام ټولو هغو کورنیو ته ورسوي چې په کورونو کې ورسره دښوونځي د اوسني نصاب شامل کتابونه له اړتیا پرته موجود وي .دهمدې سپارښتنې له مخې د کتاب ټولونې کمپاین پېل او دوام لري .تر اوسه ددغه کمپاین په ترڅ کې سلګونه ټوکه د ابتدایی،متوسطې او لېسې دورې کتابونه راټولو او په هر ښوونځي کې د یوې ځانګړې کمیټې له لورې زده کوونکوته ویشل شویدي.
دکتاب ټولونې دا کمپاین لا هم دوام لري او اټکل کیږي چې په زیاته اندازه اړتیا وړ کتابونه به راټول او پر زده کوونکو به وویشل شي.
