د خوست ولایت د مختلفو ښوونځیو سل ممتاز زده کوونکي وستایل شول

د پوهنې وزارت_خوست: د خوست ولایت د پوهنې ریاست په نوښت د دې ولایت د مرکزي لېسو سل ممتاز زده کوونکي، چې ګڼې نجونې هم په کې وې، په تحفو او ډالیو وستایل شول.
په همدې مناسبت مراسمو کې چې د پوهاند عبدالحی حبیبي لیسې په انګړ کې جوړه شوی وه ، قومي مخورو، مدني فعالانو، روڼ اندو، د رسنیو استازو، د ولسوالیو د پوهنې امرینو، ښوونکو، زده کوونکو او د زده کوونکو والدینو ګډون کړی وو.
د مراسمو په پیل کې د خوست د پوهنې رئیس نصیراحمد روښان په خپلو خبرو دا زده کوونکي چې په کلنیو ازموینو کې یې د نمرو فیصدي يې تر نورو لوړه ده وستایل او په لوستونو کې د دوی هڅې يې د قدر او د هېواد د راتلونکې لپاره د نیمکرغی او پرمختګ سبب وبللې.
ښاغلي روښان ژمنه وکړه چې د ټولو ولسوالیو د ممتازو زده کوونکو لپاره به هم دا ډول تشویقي پروګرامونه جوړ کړي.
پوهنې رئیس د ۱۳۹۸ ښوونیز کال په لړ کې د ځینو پرمختګونو یادونه هم وکړه او ويې ویل، پدې کال کې د ښوونیز بهیر د نظم او د درسي کیفیت د لوړلو لپاره متداومې هڅې وشوې، چې پایله يې ډېره ګټوره وه.
ښاغلي روښان د پوهنې بهیر په ټولو خلکو پورې اړوند وباله او له کورنیو يې وغوښتل، چې د خپلو ماشومانو، تنکیو زلمیانو او ځوانانو د زده کړو بهیر ته پاملرنه لا ډېره کړي.
د دې مراسمو یو ویناوال د خوست د اطلاعاتو او فرهنګ رئیس محمدانور زاهد وو، چې د زده کوونکو د هڅونې لپاره يې دا ډول برنامې اغېزمنې وبللې.
ده وویل، د پوهنې د مشرتابه لخوا د ممتازو زده کوونکو هڅول او تقدیرول نور زده کوونکي هم په لوستونو کې کوښښ کولو ته هڅوي او هغوی په تحرک راولي.
د باک ولسوالۍ د پوهنې امر امیربادشاه هاشمي په خپلو په دې وروستیو کې يې د پوهنې د نظارت، تدریسي بهیر او ښوونیز نظم کې پرمختګونه کم سابقه وبلل.
ده وویل، اوس د پوهنې د امرینو، مدیرانو او ښوونکو په کار او دندو کې هم ښه والۍ راغلی او هر څوک خپلو دندو ته تر پخوا ډېر متوجه شوي او د نظارت دا بهیر په منظم ډول پيګیري کیږي.
د والدینو په استازیتوب وزیربادشاه دریځ خبرې وکړې او د خلکو له ادرسه يې د پوهنې مشرتابه ته ډاډ ورکړ، چې د یو ښه او کیفي معارف د رامنځته کولو لپاره هر ډول مرستو ته تیار دي.
په پای کې د پوهنې رئیس او میلمنو لخوا پر ممتازو زده کوونکو تحایف او ډالۍ وویشل شوې، او ممتازو زده کوونکو پدې مراسمو د خوښیو څرګندونه وکړه.