په فراه ولایت کې د ۱۰۰زره امریکايي ډالرو په لګښت د یو باب مدرسې نوې ودانۍ پرانیستل شوه
په هغو مراسمو کې چې د فراه ولایت په انار دره ولسوالۍ کې د بي بي عایشه صدیقه «رضی الله عنها» د دارالعلوم د پرانیستې په مناسبت جوړ شوي وو، د یاد ولایت پر والي مولوي غوث الدین "رهبر" سربېره، پوهنې مسئولینو، د سیمه ییزو ادارو استازو، نظامي چارواکو، علماء کرامو او قومي مخورو هم حضور درلود.
د پوهنې مسئولينو د څرګندونو له مخې: دغه مدرسه د يو تن ملي سوداګر حاجي ګل احمد خواجه له خوا د څه د پاسه ۱۰۰ زرو امريکايي ډالرو په لګښت جوړه شوې ده، چې ۱۰ درسي او اداري خونې، په کمپیوټرونو سمبال د معلوماتي ټکنالوژۍ څانګه، لمریزې برېښنا سیسټم او نورې اړینې آسانتیاوې لري.
د فراه والي او نورو مسئولينو په خپلو خبرو کې وويل، پوهنې وزارت د هېواد ماشومانو لپاره لازمې ښوونيزې او روزنیزې آسانتياوې برابروي او زیاته یې کړه چې، لله الحمد په هېواد کې د ا.ا. د حاکمیت په برکت سره، سرتاسري سوله تامین شوې، زموږ ماشومان او تنکي ځوانان کولای شي چې په سوله او بشپړ امنیت کې خپلې زده کړې ترسره کړي.
يو شمېر ديني علماءکرامو او قومي مخورو هم په هېواد کې د ښوونيزو مرکزونو د پراختيا په برخه کې د پوهنې وزارت د کړنو ستاينه وکړه او له یادو پروګرامونو څخه یې خپل ملاتړ څرګند کړ.
د پوهنې وزارت مشرتابه د پوهنې په برخه کې د خلکو ونډه ستايي او مننه ترې کوي.
