بامیان ولایت کې د ۱،۵ مېلیونه افغانیو په لګښت د یو ښوونځي د ودانۍ بنسټ ډبره کېښودل شوه
د باميان ولايت ورس ولسوالۍ اړوند د تنور سراب په کلي کې د یو باب لومړني ښوونځي د ودانۍ بنسټ ډبره، د پوهنې رئيس قاري عنايت الله سهار له خوا د سيمه ييزو ادارو د يو شمېر مسئولينو په حضور کې کېښودل شوه.
پوهنې مسئولين وايي، دغه ښوونځى د سيمې د خلکو په مالي مرسته په ۲ جرېبه ځمکه کې د يو نيم مېليون افغانيو په لګښت جوړېږي، چې ۶ درسي ټولګي، ۲ اداري خونې او نورې ضروري ملحقات به ولري.
په دې مراسمو کې د پوهنې رئیس خلکو ته ډاډ ورکړ چې د پوهنې وزارت ژمن دی، تر څو د هېواد د ماشومانو لپاره سالم تعلیمي چاپېریال برابر کړي.
نوموړي زیاته کړه، د باکیفیته زده کړو لپاره باید خلک هم فعاله ونډه ولري او د پوهنې په برخه کې خپل مسئولیت اداء کړي.
بل خوا يو شمېر ويناوالو په خپلو خبرو کې د هېواد له پوهنیز نظام څخه خپل بشپړ ملاتړ اعلان کړ.
د پوهنې وزارت رهبري د پوهنې په برخه کې د خلکو له مرستو مننه کوي.
