د دایکنډي ولایت مرکزي دارالعلوم له بیارغونې وروسته پرانیستل شو
د دايکنډي ولايت په مرکز نيلي ښار کې د دارالعلوم محمديه د بيارغونې چارې چې څه موده وړاندې پيل شوې وې، بشپړې او ګټې اخيستنې ته وسپارل شو.
د ياد دارالعلوم په بیارغونه کې د درسي خونو جوړول، د دارالعلوم د دهلیزونو لپاره کانکریټ اچول، د کړکيو او دروازو ترمیمول شامل وو، چې ټولټال ۳۶۵زره ۶۴۰ افغانۍ لګښت پرې راغلی او دغه پیسې د پوهنې رياست له بودیجې څخه ورکړل شوې دي.
د دايکنډي ولايت پوهنې رئيس قاري عنايت الله سهار د ياد دارالعلوم د پرانېستې پر مهال وويل: زموږ ټولې هڅې د هېواد د ماشومانو لپاره په ښوونيزو بنسټونو کې د درسي کيفيت د لوړولو او د آسانتيا رامنځته کولو لپاره دي.
له بلې خوا يو شمېر علماوو او مسٸولينو په خپلو خبرو کې د پوهنې وزارت له مشرتابه او د دايکنډي ولايت د پوهنې رياست له پاملرنې خوښي څرګنده کړه او د پوهنې رياست له پروګرامونو يې خپل ملاتړ څرګند کړ.
