د فاضلانو د دستاربنديو د مراسمو او جلسو جوړولو په هکله د عالیقدر امي-رالم-ؤمنین حفظه الله تعالی هدایات

بسم الله الرحمن الرحیم

دا چي د دستاربندیو په جلسو کې له څو اړخونو څخه نیمګړتیاوې لیدل کیږي او ډېر وختونه له همدې امله یا لمونځ په مکروه وخت کي داخلیږي او یا هم قضاء شي، همدارنګه بې ضرورته مصارف کیږي، د دې لپاره د دستاربنديو جلسې ښه په ساده توګه ترسره شي، د مدارسو مسئولین دي د فاضلانو د دستاربندیو لپاره د مدارسو او جلسو جوړولو په هکله لاندې هدایات عملي کړي:

۱. د فاضلانو په جلسه کي دي یوازي درې تقریرونه کيږي!

۲. جلسه که د سهار له خوا دائریږي، نو ماپښین یوې بجې ته دي ختمیږي او که د ماپښین په وخت کي دائریږي نو ماځیګر لمانځه ته دي خلاصیږي، ترڅو مسلمانان خپل لمونځونه په خپل وخت کې په جماعت سره ادا کړي او جلسه د مسلمانانو د لمونځونو د قضاء کېدو لامل نه شي.

۳. د صحیح البخاري ختم او جلسه دي په یوه ورځ کې کيږي، د بخاري شريفې د ختم لپاره دي ځانته مراسم نه جوړيږي.

۴. د دې لپاره چي د بیځایه مصارفو مخنیوی وشي، په جلسو کي دي له خاصو خلکو پرته، عامو راغلو خلکو ته ډوډی نه ورکول کیږي.

۵. فاضلان دي له اصراف کولو جدي پرهېز وکړي او تر عمومي جلسې وروسته دي پر کور باندي دوهمه جلسه نه جوړوي.

۶. په جلسو کي دي یوازي د لویي دورې فاضلانو او د قرآن کریم حافظانو ته دستار بندي کيږي، د وړې دورې شاګردانو ته دي دستار بندي نه کيږي.

والسلام علیکم ورحمة الله وبرکاته!

امي-ر ال- مؤمنين شیخ القرآن والحدیث مولوي هب/ة الله اخندزاده