د قرآن کریم د حسن قرائت سیالیو ممتاز زده کوونکي وستایل شول
د پوهنې وزارت د سرچینو او ادارې معین الحاج مولوي صبغت الله وصیل له لوري هغه زده کوونکي په ډالیو وویاړل شول، چې د کابل ولایت موسهي ولسوالۍ اړوند نعمانیه دارالعلوم د قرآن کریم د حسن قرائت په سیالیو کې یې له لومړي څخه تر درېیم مقامونه خپل کړي وو.
د پوهنې وزارت د سرچینو او ادارې معین د قرآن کریم د تدریس، تلاوت او د هغو د عملي کولو په فضیلت خبرې وکړې او د یادو سیالیو د غوره زده کوونکو د ستاینې په مراسمو کې یې له ځوانانو وغوښتل، چې د قرآن کریم زده کړه وکړئ او نورو ته یې هم ور زده کړئ." تر څو د دنیا او آخرت له نعمتونو برخمن شي.
د يادونې وړ ده، چې په دغو سياليو کې د همدې ولسوالۍ د نعمانیه دارالعلوم ټولټال ٤٨ تنو زده کوونکو برخه اخيستې وه.
په پای کې د پوهنې وزارت د سرچینو او ادارې د معین او نورو مسئولینو له خوا ممتازو زده کوونکو ته ډالۍ ورکړل شوې.
