د لغمان د ښوونکو د روزنې د عالي مؤسسې څخه ۳۸ تنه ښځینه ښوونکې فارغې شوي
د پوهنې وزارت_لغمان: د لغمان ولایت د ښوونکو د روزني د عالي موسسې له خوا د یونیسف په مالي مرسته د ګېټ د برنامې څخه ۳۸ تنه ښځینه ښوونکې د ۱۴ ټولګي څخه فارغې شوی.
په هغه غونډه کې چې له همدې امله د لغمان ولایت د پوهنې ریاست د غونډو په تالار کې جوړه شوي وه ، د پوهنې رییس عبدالله حمیدی سربېره د ښوونکو د روزني عالي موسسې رٸيسې اغلې سلسله ساپۍ، د ښځو چارو رٸيسې نسيمه شفيق سادات، د دولتی ادارو یو شمیر مسوولینو، ختيځ کې د يونيسف استازي ښاغلي سېف الدين نمبير او د ګيټ پروګرام له لارې فارغ شويو زده کړيالانو ګډون درلود.
د غونډې په پیل کې د پوهنې رییس میلمنو ته د ښه راغلاست او فارغه شوي ښوونکو ته د مبارکي تر څنګ دې ولایت کې د پوهنې وضعیت په اړه معلومات د غونډې ګډونوالو ته وړاندې کړل.
د پوهنې رییس د فارغه شويو ښوونکو نه وغوښتل چې د زده کوونکو د روزلو په برخه کې دې کیفیت ته ځانګړي پاملرنه وکړي.
حمیدی د یادو ښځینه ښوونکو فراغت د لغمان ولایت د معارف ریاست لپاره یو ښه زیری وباله او زیاته یي کړه چې په ښځینه ښوونځیو کې به د مسلکي ښوونکو د نشتوالي تشه تر یوه حده ډکه کړي.
همدارنګه په ختيځ کې دیادې اداري مسوول سيف الدين نمبير فارغه شویو ښوونکو ته مبارکې وویل او د لغمان ولایت د پوهنيز نظام د تجهيز د ښوونځيو په زيربنا او تدريسي بهير کې يې د خپل د مرستو د پراخولو ژمنه وکړه .
د غونډې په پاي کې پر فارغو شویو زده کوونکو د پوهنې د مسوولینو له لوري بري لیکونه هم ووېشل شول.
د یادونې وړ ده، چې د یونیسف نړیواله اداره د نورو برنامو ترڅنګ د ګېټ برنامه د ښځینه ښوونکو په ظرفیت لوړونه کې موثر او مفید رول لري او د نجونو د تعلیم په وده او پرمختګ باندې یې مثبت سیوری غوړولی دی.
