د لوړو زدهکړو وزارت لوړپوړي پلاوي د پوهنې وزارت له اسلامي زدهکړو معین سره وکتل
د لوړو زدهکړو وزارت یو لوړپوړی پلاوي چې مشري یې د یاد وزارت مالي او اداري معین محترم الحاج مولوي حافظ حامد حسیب کوله، د پوهنې وزارت د اسلامي زدهکړو له معین محترم الحاج مولوي کرامتالله آخندزاده سره وکتل.
په یاده ناسته کې د لوړو زدهکړو وزارت د دینی جامعاتو او تخصصاتو چارو لوی رئیس محترم الحاج مولوي اسدالله فرید هم ګډون درلود.
په دغه مهمه ناسته کې دواړو لوریو د ۱۴۴۷ هـ.ق کال لپاره د ديني مدارسو د ثانویه، مافوق ثانويه، عالیه او عالمیه دورو د ګډو ازموینو پر څرنګوالي، همغږۍ او ترسره کېدو خبرې وکړې.
د پوهنې وزارت د اسلامي زدهکړو معین یادې ازموینې د دیني مدارسو د زدهکوونکو او فارغانو لپاره اړینې وبللې او ټینګار یې وکړ چې دغه ازموینې باید د دواړو وزارتونو په همکارۍ او ګډ هوکړهلیک سره په احسن ډول ترسره شي.
بل لور ته د لوړو زدهکړو وزارت مالي او اداري معین وویل، چې هغوی د ازموینو د ترسره کولو لپاره اړین چمتووالی نیولي او ډاډ یې ورکړ چې یاد وزارت به له پوهنې وزارت سره هر اړخیزه همکاري وکړي.
د غونډې په پای کې دواړو لوریو د ۱۴۴۷ هـ.ق کال لپاره د ازموینو د نېټې ټاکلو او څرنګوالي په اړه اړینې پرېکړې وکړې، ترڅو دغه ازموینې د دواړو وزارتونو له خوا په ګډه ترسره شي.
