د میدان وردګ ولایت له تعلیمي مرکزونو سره څه د پاسه ۱.۷ مېلیونه افغانۍ مرسته شوې
د میدان وردګ ولایت پوهنې ریاست د راپور له مخې، د ۱۴۰۴ لمریز کال د زمري میاشتې په جریان کې، د یاد ولایت علمپروره خلکو له لوري د ۱۸ بابه ښوونځيو سره ۱ مېلیونه ۷۰۵ زره ۸۷۰ افغانۍ مالي مرسته شوې ده.
د پوهنې ولایتي چارواکو وویل: "د سیدآباد، جغتو، چک او بهسود لومړۍ حصې ولسوالیو خلکو د ښوونځیو په بیارغونه او د دوی په سیمو کې ښوونځیو ته د ځینو اداري تجهیزاتو په برابرولو کې مرسته کړې ده."
د دغه راپور له مخې، د ۱۴۰۴ لمریز کال له پیل راهیسې، د میدان وردګ ولایت خلکو په ټولیزه توګه ۱۰.۹ مېلیونه افغانۍ ښوونځیو ته ورکړې دي.
د یادونې وړ ده چې په تېرو څلورو کلونو کې، د پوهنې وزارت، د خلکو او شریکو ادارو په همکارۍ، په هېواد کې د پوهنې معیاري کولو ته ځانګړې پاملرنه شوې ده.
