د نورستان ولایت د شیخو او دیني علماوو یوه پلاوي د پوهنې وزارت له سرپرست سره وکتل

د نورستان ولایت د شیخو او دیني علماوو یوه پلاوي، د پوهنې وزارت له سرپرست الحاج مولوي حبیب الله آغا سره وکتل.
دواړو لورو، د یاد ولایت د پوهنې په برخه کې د شته ستونزو او ننګونو په ګډون، د ښوونځیو او مدارسو لپاره د ودانیو د کمبود په اړه تفصیلي خبرې وکړې. 
دغه راز یاد پلاوي، د نورستان ولایت له ښوونیزو خدمتونو څخه محرومو سیمو ته په اشارې سره څرګنده کړه، له بده مرغه په تېرو ۲۰ کلونو کې د یاد ولایت د پوهنې برخې ته په ځانګړې توګه د دیني زده کړو د ودې او پرمختګ په برخه کې هېڅ پاملرنه نه ده شوې او په دغه ولایت کې یې د ښوونیزو ستونزو د حل په موخه، یو لړ وړاندیزونه او نظریات د وزارت له مشرتابه سره شریک کړل.
ورپسې د پوهنې وزارت سرپرست، د نورستان ولایت د دیني علماوو د راتګ هرکلی وکړ او څرګنده یې کړه، د پوهنې وزارت مشرتابه خپلو درنو ولسونو ته ډاډ ورکوي، چې د هیواد په ټولو برخو کې له هر ډول اړیکو پرته به متوازن او متعادل ښوونیز خدمات وړاندې کوي او د پوهنې وزارت ژمن دی تر څو د هېواد د نوي نسل دروزنې لپاره خپلې هلې ځلې لاپسې زیاتې کړي.
دغه راز د پوهنې وزارت سرپرست د نورستان ولایت د علماوو له پلاوي سره ژمنه وکړه، چې ان شاءالله په نیږدې راتلونکي کې به د یاد ولایت د پوهنې د وضعیت د ارزونې په موخه، دغه ولایت ته رسمي سفر وکړي.
همدارنګه د پوهنې وزارت سرپرست، د علماوو ستونزې او نظریات واورېدل او د حل په موخه یې مسئولینو ته لازمې لارښوونې وکړې.