د ولایتونو له پوهنې ریاستونو څخه څو لنډ خبرونه
ننګرهار
د ننګرهار ولایت د پوهنې یو دوست شخصیت، په خپل شخصي لګښت ( ۳۵ زره ۲۰۰ افغانیو په ارزښت)، د یاد ولایت خوګیاڼو ولسوالۍ د نجونو قیلغ مکتب، ۸۸ زده کوونکو لپاره څپلۍ وپېرلې، چې د یاد ولایت پوهنې ریاست مشرتابه، د دغه علمي خواخوږي هېوادوال له نېک احساس څخه قدرداني او مننه وکړه.
د یوبل خبر له مخې
د ننګرهار ولایت پوهنې ریاست سواد زده کړې مدېریت د یاد ولایت کرنې او مالدارۍ ریاست کارکوونکو لپاره، د سواد زده کړې یو ټولګی جوړ او هغوی ته یې د زده کړې زمینه برابره کړه.
د یاد ولایت کرنې ریاست، د پوهنې مشرتابه له دغه اقدام څخه هرکلی وکړ.
تخار
د تخار ولایت پوهنې ریاست مشورتي غونډه، د یاد ولایت پوهنې رئیس مولوي حزب الله مبشر تر څارنې لاندې د اړوندو ادارو د استازو او کارکوونکو په ګډون جوړه شوه.
د غونډې په ترڅ کې، د ښوونځيو لپاره د تدریسي موادو او خېمو د وېش په اړه تفصیلي بحثونه او مشورې وشوې.
غزني
د غزني ولایت ښوونې او روزنې آمر د خپل کاري پروګرام په ترڅ کې، د مرکز اړوند ښوونځیو او خصوصي ښوونیزو کورسونو اداري او تدریسي فعالیتونه وڅېړل.
نوموړي له مسئولینو وغوښتل، چې خپل ټول فعالیتونه د پوهنې وزارت د قوانینو او کړنلارو په رڼا کې تنظیم کړي.
دایکنډي
د دایکنډي ولایت پوهنې ریاست اداري غونډه، د یاد ولایت پوهنې رئیس مفتي رحمت الله مدثر په مشرۍ ترسره شوه او د بېلابېلو اداري مسایلو په اړه لازم تصمیمونه ونیول شول.
دغه راز په دې غونډه کې، د یاد ولايت پوهنې رياست د تفتیش یا پلټنې او بشري سرچینې مدېران چې په يادو پوستونو نوي ګمارل شوي وو، د پوهنې رئيس له لوري کارکوونکو ته ور وپېژندل شول.