د ولایتونو پوهنې خبرونو ته لنډه کتنه
بادغیس
د بادغیس ولایت پوهنې رئیس مولوي محب الله احسان د اوبو رسولو د سیستم سربېره له يو شمېر پروژو څخه کوم چې د دوو بنسټونو له لوري د شمال دریا عالي لېسې لپاره په معیاري ډول جوړې شوې دي، څارنه وکړه او له يادو مرستندویه بنسټونو څخه یې د مننې تر څنګ، پوهنې په برخه کې د لازياتې همکارۍغوښتونکى شو.
هرات
د هرات ولایت مرکز اړوند یو شمېر سیمه ییزو خلکو، دیني علماوو او د ښوونځیو د شوراګانو غړو د ياد ولايت له پوهنې رئیس مولوي رحمت الله جابر سره په کتنه کې د ښوونيزو پروګرامونو لاښه والي او پوهنې پر وړاندې د شته ستونزو حل په اړه مفصلې خبرې وکړې.
د هرات پوهنې رئيس د پوهنې په وده او پراختيا کې د ښوونځيو د شوراګانو رول مهم وباله او د پوهنيزو ستونزو په حل کولو يې ټينګار وکړ.
کندز
د کندز ولایت پوهنې ریاست د.ا.ا. له ۸۲ تنو م/جاهدينو څخه د سويې د تثبيت آزموينه واخيسته؛ ترڅو وړ کسان د زده کړو دوام لپاره په بېلابېلو ښوونځیو کې شامل شي.
هلمند
د هلمند ولایت پوهنې رئیس الحاج مولوي محمد عوض انصاري د دغه ولایت د مرکزي دارالعلوم له اداري او تدریسي چارو څخه څارنه وکړه او د چارو پر لاښه والي یې د ټینګار تر څنګ، له ښوونکو او زده کوونکو وغوښتل، تر څو خپل صورت او سيرت د حضرت محمد (صلي الله عليه وسلم) پر سنتو برابر کړي.
سرپل
د سرپل ولایت پوهنې ریاست اداري غونډه، د پوهنې رياست د ښوونې او روزنې آمر په مشرۍ د پوهنې مسئولینو او همکارو ادارو په ګډون جوړه شوه.
د غونډې پر مهال د دندو پر مثبتو ټکو سربېره د ستونزو د حل په لارو چارو هم تفصيلي بحثونه وشول.
