د پوهنې محترم وزیر د پکتیا ولایت له یو شمېر تعلیمي مرکزونو څخه لیدنه وکړه
د پوهنې محترم وزیر الحاج مولوي حبیب الله آغا د یاد وزارت د مسلکي پراختیا او نصاب لوی رئیس الحاج مولوي اول ګل ایوبي او د پکتیا ولایت پوهنې رئیس الحاج مولوي عبدالقیوم فاروقي په ملتیا په مرکز ګردیز ښار کې د عثمانیه او تحفیظ القرآن دیني مدارسو او تجربوي عالي لېسې څخه لیدنه وکړه.
د پوهنې محترم وزیر د پورته ذکر شویو تعلیمي مرکزونو له ښوونکو، مهتممینو او منسوبینو سره د لیدنو په جریان کې، طلاب او زدهکوونکي د افغانستان د راتلونکي معماران وبلل، د هغوی تعلیمي وضعیت یې هم وارزاوه او وړتیاوې یې مثبتې وګڼلې.
دغه راز نوموړي زدهکوونکو، ښوونکو او نورو چارواکو ته توصیه وکړه چې د تېرو تجربو په پام کې نیولو سره باید پر خپلو وړتیاوو ډېر کار وکړي او له هغو څخه په سالمه توګه ګټه پورته کړي.
د پوهنې محترم وزیر د دیني او عصري علومو زدهکړه د هر چا لپاره اړینه وبلله او ټینګار یې وکړ چې د هېواد د دفاع لپاره باید هر څه ته چې اړتیا وي، چمتو شي.
همدارنګه نوموړي د یونیفورم قانون پلي کول یو مهم ګام وباله او زیاته یې کړه چې یاد قانون د پکتیا ولایت په ډېرو ښوونځیو کې پلی شوی دی.
