د پوهنې وزارت د اسلامي زده کړو معین د بلخ ولایت له جهادي مدرسې او مرکزي یتیم خانې څخه لیدنه وکړه
د پوهنې وزارت د اسلامي زده کړو معین الحاج مولوي کرامت الله اخندزاده په داسې حال کې چې د بلخ ولایت د پوهنې رئیس مولوي عبدالجلیل شهیدخیل هم ورسره ملتیا کوله، د بلخ ولایت له جهادي مدرسې او مرکزي یتیم خانې څخه لیدنه وکړه.
لومړی د پوهنې وزارت معین د بلخ د جهادي مدرسې له مسوول شیخ نورمحمد سره د دغې لېسې له استادانو او زده کوونکو سره د لیدنې پر مهال وویل، په هېواد کې د جهادي مدرسو د جوړېدو موخه په اسلامي روحيې سره د نوي نسل روزنه ده، ترڅو د الهي دين احکام خلکو ته ورسوي.
نوموړي وویل، چې نوي نصاب د ټولنې اوسنیو اړتیاوو پر اساس جوړ شوی، او د جهاد بریا یې د همدغو علماوو د هڅو پایله وبلله
ورپسې د بلخ د جهادي مدرسې مشر د پوهنې وزارت معین ته د ښه راغلاست په ترڅ کې د دغه مرکز تدریسي، اداري او مالي ستونزې یې بیان کړې او په دیني مدرسو کې د تدریسي بهیر د ښه والي په اړه یې خپل نظریات وړاندې کړل.
د دغه سفر په دوام کې د پوهنې وزارت معین د بلخ د پوهنې له رئیس سره یو ځای د بلخ له مرکزي یتیم خانې څخه هم لیدنه وکړه او د دغه ولایت له مدرسو او نورو دیني بنسټونو سره یې د پوهنې وزارت د هر اړخیز ملاتړ ډاډ ورکړ.
