د پوهنې وزارت د اسلامي زده کړو معین د خپلو ولایتي سفرونو په دوام بغلان ولایت ته ورسېد
د پوهنې وزارت د اسلامي زده کړو معین الحاج مولوي کرامت الله آخندزاده، د افغانستان.ا.ا. عالي مقام د مشرتابه په لارښوونه، د هېواد شمال ولایتونو ته د خپلو سفرونو په دوام، نن بغلان ولایت ته ورسېد او د یاد ولایت له پوهنې رئیس مولوي محمد نور عزیزي سره یې وکتل.
نوموړي یاد ولایت ته د خپل سفر موخه، په مرکز په ولسوالیو کې د دیني مدارسو څارنه او په لیرې پرتو سیمو کې د زده کوونکو لپاره د لیلیې جوړول وبلل.
د اسلامي زده کړو معین د دغه ولايت د اطلاعاتو او فرهنګ رئيس مولوي اسدالله هاشمي په ګډون د پوهنې رياست له مسئولينو او علماوو سره په کتنه کې، د ديني مدارسو او ليليې د جوړولو په اړه هراړخيزې خبرې وکړې.
ګډون والو د .ا.ا.ا. عالي مقام له مشرتابه او د پوهنې وزارت له هلوځلو څخه چې په هېواد کې یې د اسلامي زده کړو د وضعیت لاښه والي په برخه کې کړي دي یادونه وکړه او په دې برخه کې یې د پوهنې وزارت له مشرتابه سره د هر راز همکاریو ژمنه وکړه.
په پام کې ده چې د پوهنې وزارت د اسلامي زده کړو معین په یاد ولایت کې له یو شمېر مدارسو او د اسلامي زده کړو له نورو بنسټونو څخه هم لیدنه وکړي.
