د پوهنې وزارت د داخلي پلټنې نوی رئیس د يادې ادارې کارکوونکو ته ور وپېژندل شو.
د پوهنې وزارت د داخلي پلټنې نوی رئیس مولوي عتیق الله مؤذن، د ياد وزارت د سرپرست الحاج مولوي حبیب الله آغا له لوري، د يو لړ مراسمو په ترڅ کې د دغه ریاست کارکوونکو ته ور وپېژندل شو.
په دې غونډه کې د سرچينو او اداري چارو معين مولوي صبغت الله وصيل، د بهرنيو اړيکو رئيس استاد وحيدالله هاشمي او د پوهنې وزارت مرستندويانو هم حضور درلود.
د پوهنې وزارت سرپرست، په اداره کې د اصلاحاتو او پرمختګ اصل، تغییر او بدلون وباله او د مرکزي تفتیش له پخواني رئیس څخه یې د فعاليتونو په تړاو ځانګړې مننه وکړه.
نوموړي مولوي عتیق الله مؤذن په حقوقي چارو کې د تجربې خاوند او په کار پوه شخص وباله او له کارکوونکو يې وغوښتل چې په چارو کې ورسره همکاري وکړي.
د پوهنې وزارت سرپرست د ياد وزارت د کارکوونکو په ګډون د ټولنې د ټولو غړو ترمنځ د باور پر اهمیت او ارزښت خبرې وکړې او ويې ویل:( په هغه موده کې چې ما په پوهنې وزارت کې دنده ترسره کړې، په ښکاره توګه لیدل شوي چې د ياد وزارت کارکوونکي په ټولو رسمي کارونو کې يووالی لري او په پوره مېړانه، اېماندارۍ او د باور په فضا کې خپلې دندې ترسره کوي او له ټولو څخه مننه کوم.
د پوهنې وزارت د سرچينې او ادارې معين هم د تفتیش او پلټنې رئیس ته د نوي مسؤلیت مبارکي وویله او د آمرينو په اطاعت یې ټینګار وکړ .
نوموړي زياته کړه، چې د آمرينو او مشرانو اطاعت د دوی له اساسي او اسلامي اصولو څخه دی، چې په ټولنه کې د نظم او اداري فعالیتونو د ګړندیتوب لامل ګرځي.
ورپسې د تفتيش او پلټنې نوي رئیس مولوي عتیق الله مؤذن د افغانستان.ا.ا له عالي رهبرۍ، په ځانګړي ډول د پوهنې وزارت د رهبري هیئت د باور قدرداني وکړه او ډاډ یې ورکړ، چې په خپل ټول توان او له علمي پوهې او کاري تجربې څخه په استفادې سره به ورسپارل شوې دنده په ښه توګه سرته ورسوي.
غونډه د دعائيې په لوستلو سره پای ته ورسېده.
