د پوهنې وزارت د دعوت او ارشاد ریاست پلاوي د پکتیکا ولایت له پوهنې چارواکو او ښوونکو سره وکتل
د پوهنې وزارت د دعوت او ارشاد ریاست پلاوي، د پکتیکا ولایت له پوهنې مسئولینو سره د امربالمعروف او نهی عن المنکر د فعالیتونو لا پیاوړتیا په موخه ګډه غونډه وکړه.
د پوهنې وزارت د دعوت او ارشاد ریاست استازي محترم مولوي بسم الله حسان، په یاد ولایت کې د خپل ریاست اړوندو لارښوونو له پلي کېدو څخه خوښي څرګنده او د هغو له هڅو یې ستاینه وکړه.
نوموړي وویل: د هر مسلمان دنده ده، چې خپل صورت او سیرت د رسول الله «صلی الله علیه وسلم» له سنتو سره سم برابر او د هغو مطابق عمل وکړئ.
هغه مسئولیت یو الهي امانت وګاڼه او ویې ویل چې ښوونکي نه یوازې د زدهکوونکو د علمي زدهکړې مسئولیت لري، بلکې د هغوی د فکري، اخلاقي او مذهبي روزنې بنسټیزه دنده هم پر غاړه لري.
وروپسې د پکتیکا پوهنې رئیس محترم مولوي عبدالوکیل خالد پلاوي ته د ښه راغلاست ترڅنګ، د پوهنې وزارت د دعوت او ارشاد ریاست له هڅو او فعالیتونو ستاینه وکړه او ویې ویل چې د دې چارو پلي کول د ټولنې د اصلاح لپاره اړین دي.
دغه راز نوموړي ډاډ ورکړ چې د پکتیکا ولایت پوهنې ریاست د پورته ذکر شوې ادارې ټول قوانین او لارښوونې په بشپړه توګه پلي کړې دي.
