د پوهنې وزارت د سرچینو او ادارې معین له لوري د کابل ولایت په ولسوالیو کې د پوهنې آمریتونو تشکیلاتي کمښت په نمونوي توګه وارزول شو
د پوهنې وزارت د سرچینو او ادارې معین الحاج مولوي صبغت الله وصیل په داسې حال کې چې د یاد وزارت یو شمېر مرکزي رئیسانو یې ملتیا کوله، د مرکز او ولایتونو د پوهنې آمریتونو د تدریسي او اداري څانګو د تشکیلاتي نیمګړتیاوو ارزونې په موخه، د کابل ولایت چهارآسیاب او موسهي ولسوالیو ته ولاړ او د یادو ولسوالیو د پوهنې اداري جوړښت یې په نمونوي توګه وارزاوه.
د پوهنې وزارت معین او ورسره مل پلاوي د يادو ولسواليو د پوهنې له مسئولينو سره د ليدنو کتنو په ترڅ کې، د اداري او تدريسي تشکیلاتي جوړښت په اړه مفصلې خبرې وکړې.
یا پلاوي د تشکیلاتي جوړښت د ارزونې په ترڅ کې له مسئولینو سره د ښوونځیو د ودانیو کمښت او نورو درسي آسانتیاوو ته د زده کوونکو د نه لاسرسي په اړه خبرې وکړې او د حل په برخه کې یې د وزارت مشرتابه د همکارۍ ډاډ ورکړ.
په پام کې ده، چې د اداري چارو د پرمختګ او تدریسي کیفیت لاښه والي په موخه، به د هېواد د ټولو ولایتونو د پوهنې ریاستونو له هر اړخیزې ارزونې وروسته لازمې پرېکړې وشي.
