د پوهنې وزارت د معلوماتي ټکنالوژي د رئيس الحاج قاري سیف الله آخندزاده د وفات په مناسبت د پوهنې وزارت د تسلیت پیغام
بسم الله الرحمن الرحیم
په ډېره خواشیني سره مو خبر تر لاسه کړ چې د پوهنې وزارت د معلوماتي ټکنالوژي رئیس الحاج قاري سیف الله آخندزاده د ګاز نیونې له امله وفات شو. انا لله و انا الیه راجعون.
د پوهنې وزارت د نوموړي وفات د یاد وزارت او په ټوله کې د اسلامي امارت لپاره یوه ستره ضایعه ګڼي، نوموړي ته دجنت الفردوس دعا کوي، کورنۍ، دوستانو او متعلقینو ته یې د جمیل صبر غوښتنه کوي او ورته د تسلیت مراتب وړاندې کوي.
مرحوم الحاج قاري سیف الله آخندزاده یو عالم، حافظ، مجاهد، مخلص، هیواد، ملت او د اسلامي امارت ارمانونو ته یو ژمن شخصیت وو، په دیني او عصري علومو سنبال وو، تر فتحې مخکې یې د اسلامي امارت د سیاسي او تعلیمي کمېسیونونو په چوکاټ کې نه هیرېدونکي خدمتونه سرته رسولي دي، تر فتحې وروسته د پوهنې وزارت د معلوماتي ټکنالوژي ریاست د رئیس په توګه وټاکل شو او د یاد وزارت لپاره یې نه هيرېدونکي خدمتونه ترسره کړل.
الله تعالی دې د نوموړي ټول جهادي، دعوتي او تعلیمي خدمتونه او حسنه اعمال په خپل دربار کې په قبول حسن سره قبول او منظور وګرځوي. آمین
الحاج مولوي حبیب الله آغا
د پوهنې وزارت سرپرست
