د پوهنې وزارت د ښوونې او روزنې معین پکتیکا ولایت ته رسمي سفر وکړ
د پوهنې وزارت د ښوونې او روزنې معین الحاج مولوي سخاءالله سعید پکتیکا ولایت ته د خپل رسمي سفر پرمهال، د یاد ولایت له پوهنې رئیس مولوي عبدالوکیل خالد او مرستیال والي سره وکتل.
په هغه کتنه کې چې نوموړي د پوهنې له رئیس او مسئولینو سره درلوده، د تدریسي چارو د کیفیت لاښه والي په موخه یې هغوی ته یو لړ اصلاحي سپارښتنې وکړې او د یو شمېر مدارسو او ښوونځیو څخه یې هم لیدنه وکړه.
په ورته مهال د پکتيکا ولايت مرستيال والي د پوهنې وزارت له معین څخه وغوښتل، تر څو په سرحدي سيمو کې د مدارسو او ښوونځيو کمښت ، د تشکیلاتو کمښت او یو لړ نورو ستونزو ته پاملرنه وکړي او د ښوونکو د وړتیا لوړولو په موخه د سیمینارونو کچه لوړه کړي.
نوموړي زياته کړه، چې د زده کوونکو د استعدادونو پراختیا په موخه دې د هغوی ترمنځ علمي سيالۍ هم زیاتې شي.
دغه راز د پکتیکا مرستیال والي ژمنه وکړه، چې د یاد ولایت رهبري د پوهنې وزارت د پروګرامونو تطبیق په برخه کې هر ډول همکاریو او ملاتړ ته چمتو ده.
په پام کې ده چې د پوهنې وزارت معین د دغه ولایت سرحدي ولسوالیو ته د خپل سفر په ترڅ کې له یو شمېر مدارسو او ښوونځیو څخه هم لیدنه وکړي، تر څو د هغوی ستونزو ته رسېدنه وکړي.
