د پوهنې وزارت له لوري د آنلاین راپور ورکولو سیسټم په تړاو د مرکزي ریاستونو د راپور ورکولو مسئولینو ته ورکشاپ جوړ شو
د پوهنې وزارت د څارنې او ارزونې ریاست له لوري د یاد وزارت د معلوماتي ټکنالوژۍ ریاست سره په همکارۍ، د آنلاین راپور ورکولو یو ځانګړی سیسټم طرحه او په اړه یې یو ورکشاپ جوړ کړ.
د یاد ورکشاپ په پرانیستغونډه کې د پوهنې وزارت د څارنې او ارزونې رئیس غلام ربي رباني، یو شمېر کارپوهانو او د پوهنې د مرکزي ریاستونو د راپور ورکولو مسئولینو هم ګډون درلود.
د پوهنې وزارت د څارنې او ارزونې رئیس په ورځنیو چارو کې له ټکنالوژۍ څخه د ښې استفادې او د یاد وزارت د سیسټمونو برېښنایي کېدو ته په اشارې سره څرګنده کړه، چې له یاد سیسټم څخه په ګټې اخیستنې سره به د اسنادو ساتنې، په لېږد کې د چټکتیا او لازیاتې روڼتیا ترڅنګ، د ریاستونو ترمنځ د هغو په لېږد رالېږد کې د وخت د ضایع کېدو مخه هم ونیول شي.
د يادونې وړ ده، چې د ياد سيسټم تخنيکي چارې د پوهنې وزارت په مرکزي دفترونو کې بشپړې شوې دي؛ خو د ولايتونو د پوهنې رياستونو ترمنځ د راپور ورکولو د سيسټم د بشپړېدو چارې روانې دي او په نېږدې راتلونکي کې به ګټې اخيستنې ته چمتو شي.
