د پوهنې ځینې ولایتي خبرونه
میدان وردګ:
د میدان وردګ ولایت جلریز ولسوالۍ اړوند د امام باقر عالي لېسې شورا د یاد ښوونځي لپاره د ۸۴ زره افغانیو په ارزښت، لپ ټاپ کمپیوټر وپېره او د لمریزې برېښنا سیسټم یې هم فعال کړ.
سمنګان:
د سمنګان ولایت په پوهنې ریاست کې د ښوونکو د پورونو صندوق پرانیستل شو او په فعالیت یې پیل وکړ.
د مسئولينو د معلوماتو له مخې، دغه پورونه ښوونکو ته د ځانګړې کړنلارې له مخې ورکول کېږي او هره مياشت د ښوونکو له معاش څخه په قسطونو کې اخيستل کېږي.
غور:
د پوهنې وزارت د پالیسۍ له مخې په هېواد کې د بې سوادۍ له منځه وړلو په موخه، اوسمهال د غور ولایت پوهنې ریاست مسئولینو له خوا د یاد ولایت د حج او اوقافو ریاست خدمتي کارکوونکو لپاره د سواد زده کړې کورس جوړ شو، چې د پیل سره سم د پوهنې ریاست لخوا د همدغه کورس پر ګډن والو ښوونیز توکي ووېشل شول.
