د پکتیا ولایت دیني علماوو او قومي مشرانو د پوهنې وزارت د سرچینو او ادارې له معين سره وکتل

د پکتيا ولايت سيد کرم ولسوالۍ ولسوال علي محمد مجاهد او د يادې ولسوالۍ يو شمېر ديني علماوو او قومي مشرانو د پوهنې وزارت د سرچينو او ادارې له معين مولوي صبغت الله وصيل سره وکتل.

په ياده کتنه کې ولسوال او د يادې ولسوالۍ مشرانو د خپلو ښوونيزو ستونزو لکه، د مسلکي ښوونکو د کمښت، د ښوونځيو د ترميم او مناسب تعليمي چاپېريال، د ښوونځيو د زده کوونکو لپاره د درسي کتابونو د نشتوالي په اړه يې د پوهنې وزارت له سرچينو او ادارې له معين سره تفصيلي خبرې وکړې او د یادو ستونزو په حل کې یې د همکارۍ غوښتنه وکړه.

له بلې خوا د پوهنې وزارت معين د یاد ولایت سید کرم ولسوالۍ قومي مشرانو ته د ښه راغلاست په ترڅ کې د دوی ستونزې او اړتیاوې واورېدې او ژمنه یې وکړه، چې د یاد وزارت له امکاناتو سره سم به د اړوندو ستونزو په حل کې اقدام وکړي.

همدارنګه نوموړي د پکتيا ولايت اوسېدونکو د وطن دوستۍ او پوهنې له احساس څخه خوښي څرګنده کړه.

غونډه د هېواد د آبادۍ په دعائيې سره پای ته ورسېده.