د پکتیا ولایت مدرسینو او ښوونکو لپاره "د ارزونې کړنلاره" تر سرلیک لاندې سیمینار جوړ شو
د افغانستان.ا.ا. د چارو ادارې لوی ریاست اړوند د اداري اصلاحاتو او ملکي خدمتونو ریاست له لوري، د پوهنې وزارت سره په همغږۍ، د پکتیا ولایت د مرکز او ولسوالیو پوهنې آمرینو، د ښوونکو مسلکي پراختیا غړو او د تعلیمي ادارو مسئولینو لپاره د "ارزونې کړنلاره" ترسرلیک لاندې یو ورځنی روزنیز سیمینار ترسره شو، چې د اداري اصلاحاتو او ملکي خدمتونو رئیس محترم مولوي محمد صابر فاروقي، د یاد ولایت پوهنې رئیس محترم الحاج مولوي عبدالقیوم فاروقي او چارواکو په کې ګډون درلود.
د پروګرام په پیل کې د پوهنې رئیس ګډونوالو ته ښه راغلاست ووایه او د اداري اصلاحاتو او ملکي خدمتونو ریاست له رئیس او کارکوونکو څخه یې د ستاینې په ترڅ کې وویل: د سیمینار له لاسته راوړنو څخه اعظمي ګټه پورته کړئ، ترڅو دغه لاسته راوړنې په خپلو ورځنیو رسمي چارو کې د کار کیفیت لاښهوالي په موخه پلي شي.
ورپسې د اداري اصلاحاتو او ملکي خدمتونو رئیس هم په خپله وینا کې څرګنده کړه: د چارو ادارې لوی ریاست هڅه کوي خلکو ته اسانتیاوې برابرې کړي، چې پر بنسټ یې "د اداري پروسو ساده کولو ریاست" تاسیس شوی دی.
په پای کې همدغه سیمینار په رسمي ډول د اداري اصلاحاتو او ملکي خدمتونو ریاست کارپوهانو لخوا پرانیستل شو.
