فاریاب ولایت کې د څه کم ۱۲ مېلیونه افغانیو په لګښت د یو ښوونځي نوې ودانۍ پرانیستل شوه
د فاریاب ولایت میمنې ښار په مرکز کې د سلطان حسین بایقرا لومړني ښوونځي نوې ودانۍ، چې د یو همکار بنسټ په ملاتړ د ۱۱.۹۳ مېلیونه افغانیو په لګښت جوړه شوې، د پوهنې مسئولینو او د سیمهییزو ادارو د چارواکو په ګډون د یوې ځانګړې غونډې په ترڅ کې ګټې اخستنې ته وسپارل شوه.
په دې پرانیستغونډه کې د یاد ولایت والي، پوهنې رئیس، علماءکرام، قومي مشران او ښوونکي حاضر وو.
د فاریاب پوهنې رئیس محترم الحاج مولوي حمیدالله ارشاد د روان کال د فعالیتونو د راپور وړاندې کولو ترڅنګ څرګنده کړه چې:"معارف د ټولو افغانانو ګډ کور دی او د پوهنې وزارت رهبري د ښوونې او روزنې د ارزښت په درک سره تل هڅه کوي، چې لازمې تعلیمي اسانتیاوې، مناسب ځای او خوندي چاپېریال د هېواد د اولادونو لپاره برابر کړي."
د مسئولینو په وینا، دغه ښوونځی په هغه ۲۰۰۰ متره مربع ځمکه جوړ شوی، کوم چې د سیمې د یوه علمپرور شخص لخوا وقف شوې وه.
یاده ودانۍ ۶ درسي ټولګي، اداري خونه، لابراتوار، د ساتونکي کوټه، برېښنا شبکه، احاطوي دېوال، څښاک پاکو اوبو سیسټم، زدهکوونکو او ادارې لپاره مېز او څوکۍ، اور وژنې وسایل، لوبغالی او نورې ضروري برخې لري.
