له مرکز او ولایاتو څخه د پوهنې خبرونه.

فراه:
د فراه ولایت د بکواه ولسوالۍ د نعماني مدرسې لس تنو د قران کریم حافظانو ته د فضیلت لنګوټې د پوهنې د مسوولینو، دیني عالمانو، قومي مشرانو او د سیمې خلکو په ګډون د یوې غونډې په ترڅ کې وتړلې. د دغه ولایت د پوهنې رئیس د قرآن کریم د ارزښت او په دنیا او آخرت کې د حافظ د مقام په اړه خبرې وکړې. د خبرو پرمهال یې له خلکو وغوښتل چې خپل اولادونه مدارسو ته واستوي.
دایکندي:
د دايکنډي د پوهنې رياست د عمومي زده کړو د آمر قاري عنايت الله سهار په مشرۍ د دغه رياست له مسوولينو او کارکوونکو سره غونډه جوړه شوه، چې په کې د اصولو په رعايت، د مراجعينو د کارونو پر اصولو، د ولسوالیو له آمریت سره همغږي رامنځ ته کول او په وخت سره د راپورونو راټولولو او یووالي په اړه بحث او پریکړه وشوه.
ننګرهار:
د ننګرهار ولايت د پوهنې رئيس مفتي حبيب الله حضرت حقاني په خپل دفتر کې د ملي ټلوېزيون او اطلاعاتو او کلتور له مسوولينو سره وکتل او د ښوونې او روزنې پر مهمو موضوعاتو يې خبرې وکړې او په دې برخه کې يې د مثبتو بدلونونو په اړه خپله خوښي څرګنده کړه.
لغمان:
د لغمان ولایت د پوهنې ریاست مسوولین وايي: د HHRD موسسې د ۱۰۰ جلا ټیمونو په جوړښت کې د لغمان، ننګرهار او کنړ ولایتونو د ښوونځیو د زده کوونکو لپاره علمي سفرونو، درسي او سپورتي رقابتونو سیالۍ برابرې کړې.
 د مسوولينو د څرګندونو له مخې: دغه سيالۍ د ننګرهار ولايت په بټي کوټ ولسوالۍ کې د يادو ولايتونو د پوهنې د مسوولينو او نورو دولتي بنسټونو په شتون سره ترسره شوې.
کابل:
د کابل ولایت د پوهنې ریاست د انجینرۍ مدیریت څخه په خپره شوې خبرپاڼه کې راغلي چې ابرار موسسې د دغه ولایت په خاکجبار او قرباغ ولسوالیو کې د څلورو ښوونځیو د حلقوي دیوالونو د جوړولو کار پیل کړی دی.
د مسوولينو د څرګندونو له مخې: د دغو ديوالونو د جوړولو کار د انجنيرۍ د ټيم تر څارنې او د هغوى تر لارښوونې لاندې روان دى.