له ولایاتو څخه د پوهنې اړوند لنډ خبرونه
پکتیکا:
د پکتیکا ولایت د ګیان والسوالۍ د پوهنې آمریت مسوولینو د دې والسوالۍ د امام ابوحنیفه مدرسې له کلنۍ ازموینې څخه د څارنې او د ازموینې د سوالونو او نورو معیارونو د څېړلو پرمهال د ازموینو پر عدالت او شفافیت ټینګار وکړ.
کندهار:
د کندهار د خاکریز والسوالۍ د پوهنې آمر مولوي عبدالحنان د یوه پلاوي په ملتیا د عشرې مبشرې دارالعلوم له اداري او تدریسي چارو څخه څارنه وکړه او مسوولینو ته یې د تدریسي کیفیت د ښه والي په موخه لازمې لارښوونې وکړې.
نورستان:
د نورستان ولایت د پوهنې رئیس مولوي تاج محمد مطمین د دغه ولایت کامدېش والسوالۍ ته د یوه کاري سفر په ترڅ کې د دې والسوالۍ د پوهنې له آمر او د پوهنې له کارکوونکو سره وکتل او هغوی یې وهڅول چې خپلې دندې په صداقت سره ترسره کړي. په دې کتنه کې یې د مسوولینو ستونزې او وړاندیزونه هم وارویدل او د حل په برخه کې یې ورسره ژمنه وکړه.
لوګر:
د لوګر ولایت د پوهنې ریاست سکتوري غونډه د دغه ریاست د ښوونې او روزنې د آمر مولوي عبیدالله هشام په مشرۍ جوړه شوه.
په دې غونډه کې د لوګر د پوهنې ریاست سره مرستندویو ادارو د خپلو لاسته راوړنو او فعالیتونو راپور او د راتلونکې میاشتې لپاره خپل پلانونه د غونډې ګډونوالو ته وړاندې کړل.
بلخ:
د دې ولایت د بلخ والسوالۍ په نوبهار او فریده بلخي لېسو کې د څښاک د اوبو د دوو څاګانو او د ۸ سیپټیک د جذب څاګانو کیندل دوه پرمختیايي پروژې څه موده وړاندې د اکتید د ولایتي ادارې له خوا د ۶۳۰ زره افغانیو په لګښت پیل شوې وې. د دغه ولایت د پوهنې ریاست او د یادې ادارې د استازو په حضور کې بشپړ او ګټې اخیستنې ته وسپارل شوې.
