لوګر کې خلکو د نجونو یوه ښوونځي ته دوه درسي ټولګي جوړ کړي

د پوهنې وزارت_لوګر: د لوګر په مرکز پل علم پورې اړوند د شهیدې سعدې د نجونو لېسې ته د زده کوونکو د کورنیو غړو دوه درسي ټولګي جوړ کړي.
د یادو درسي ټولګیو پر جوړولو شاوخوا ۱۰۰ زره افغانۍ لګېدلي، چې ټولې لګول شوې پیسې د زده کوونکو د کورنیو غړي ورکړي.
دغه درسي تولګي په پاخه او اساسي ډول جوړ شوي، چې په یوه وخت کې د ۱۰۰ تنو زده کوونکو د ځایولو وړتیا لري.
د شهیدې سعدې د نجونو لېسه ۱۷ کاله مخکې فعاله شوې، چې له لومړي ټولګي څخه تر دولسم ټولګي پورې ۹۸۲ زده کوونکې لري.
نوموړې لېسې ته ۱۵ کاله وړاندې یوه دوه پوړېزه ودانۍ هم جوړه شوې، چې ۲ اداري خونې، ۱۳ درسي تولګي او نور اړین ملحقات لري.
د لوګر د پوهنې سرپرست رئیس نثار احمد سیدي د یادې لېسې د زده کوونکو د کورنیو له غړو څخه د مننې ترڅنګ د هغوی دا کار وستایه.
هغه زیاته کړه، چې د نوموړو ټولګیو په جوړولو سره د دوو ټولګیو د زده کوونکو د سرپناه ستونزه هواره شوه.
د یادونې وړده، چې په لوګر کې د روان ۱۳۹۸ کال له پیله تر اوسه خلکو ۵ نورو ښوونځیو ته هم درسي ټولګي جوړ کړي دي.