لوګر کې د دولسمو ټولګیو فارغانو ته د کانکور تیاري زده کړې ورکړل شوې
د پوهنې وزارت_لوګر: په لوګر ولایت کې د روان ۱۳۹۸ کال د دولسمو ټولګیو سلګونو فارغینو ته په عملي بڼه د کانکور د تیاري روزنه ورکړل شوه.
دغه روزنه د پوهنې ریاست د غوښتنې له مخې د لوړو زده کړو وزارت او د یاد ولایت د پوهنتون استادانو په ګډه ورکړه.
په دې روزنه کې د دولسمو ټولګیو فارغینو ته د کانکور ازموینې له اصلي بهیر سره د بلدېدو په موخه اړینې لارښوونې او معلومات ورکړل شول.
د لوګر د پوهنې سرپرست رئیس نثار احمد سیدي پر یادې روزنې خوښي څرګنده کړه او زیاته یې کړه، چې چې له دې مخکې هم د ښوونځیو له لارې د دولسمو ټولګیو فارغانو ته د کانکور چمتوالي په برخه کې معلومات ورکړل شوي دي.
د یادونې وړده، چې د لوګر د کانکور را روانې ازموینې ته د ۳۶۰ نجونو په ګډون ۳۴۰۰ تنو، چې د دولسمو ټولګیو فارغان دي خپل نومونه لیکلي دي.
