په بدخشان ولايت کې ديوه لومړني ښوونځي د بنسټ ډبره کېښودل شوه

  د بدخشان ولايت مرکز فيض آباد ښار وکيل آباد سيمه کې، د شېرخان لومړني ښوونځي د بنسټ ډبره د يو لړ هغو مراسمو په ترڅ کې، چې د ياد ولايت پوهنې رئيس، ښاروالۍ رئيس، دیني عالمانو او قومي مشرانو پکې ګډون درلود؛ کېښودل شوه. 
 د ياد ولايت د پوهنې  مسئولينو د څرګندونو له مخې: د ياد ښوونځي ودانۍ به په یوه پوړ کې، چې آته درسي ټولګي او يو احاطوي دېوال ولري او په لمريزې برېښنا سيسټم، يوه ژوره څاه، يو تشناب، میز او څوکۍ به سمباله وي، جوړه شي.
   د یاد ښوونځي ټول لګښت ۲۱ میلیونه ۶۹۵ زره ۸۸۵ افغانۍ اټکل شوی، چې د ملګرو ملتونو د کډوالو چارو د عالي کمیشنرۍ(UNHCR) د ساحوي دفتر له خوا تمویلیږي.
  دبدخشان ولايت پوهنې رئيس، د ياد مرستندويه بنسټ له  مرستې څخه دخوښۍ څرګندولو په ترڅ کې، له خلکو وغوښتل چې خپل ماشومان د زده کړو په موخه مدارسو او ښوونځيو ته واستوي.
  د يادونې وړ ده، چې د ياد ښوونځي زده کوونکو تر دې مهاله په آزاده فضا کې زده کړې کولې او د ودانۍ بيارغونې چارو په بشپړېدو سره به له خوندي او مناسب درسي چاپېريال څخه برخمن شي.