په بهر کې د افغان کډوالو د اتحادیې استازو د پوهنې وزارت له سرپرست سره وکتل

په اروپا کې مېشتو افغان علمي او فرهنګي شخصیتونو د پوهنې وزارت له سرپرست الحاج مولوي حبیب الله آغا سره وکتل.

په پیل کې د یاد پلاوي استازو، د پوهنې له ترسره شویو پرمختګونو او د هېواد بچیانو لپاره د دیني او عصري علومو په برخه کې د ښوونیزو او روزنیزو آسانتیاوو په برابرولو د خوښۍ ترڅنګ، د ښوونيز او روزنيز بهير په تړاو تفصيلي خبرې وکړې.

په ياده کتنه کې راغلي پلاوي د هېواد د پوهنيز نظام د لاښه والي په اړه یو لړ نظریات او وړاندیزونه د پوهنې وزارت مشرتابه ته وړاندې کړل، چې د ياد وزارت د سرپرست له خوا په لېوالتیا سره واورېدل شول.

ورپسې د پوهنې وزارت سرپرست د یاد پلاوي راتګ ته ښه راغلاست ووایه او د ياد وزارت د راتلونکو پلانونو او پروګرامونو په اړه یې راغلي پلاوي ته معلومات وړاندې کړل، چې د دوی له لوري یې هرکلی وشو.

همدارنګه نوموړي د ښوونيز نظام په تړاو د افغان پلاوي وړاندیزونه اغېزمن وګڼل او د هغوی ملي احساس یې وستایه.

غونډه د دعائیې په لوستلو سره پای ته ورسېده.