په سرپل ولایت کې د یو باب ښوونځي نوې ودانۍ پرانیستل شوه
د سرپل ولایت پوهنې ریاست په یوه خبرپاڼه کې ویلي: په دې وروستیو کې د یاد ولایت سانچارک ولسوالۍ اړوند په ګذر کلي کې د یو باب اناثیه ښوونځي د ودانۍ چارې بشپړې او د دغه ولایت د پوهنې ریاست مسئولینو له خوا ګټې اخستنې ته وسپارل شوه.
ياده نوې ودانۍ چې ۸ درسي ټولګي، ۴ اداري خونې له ټولو لوازمو سره او ۱۶۰ مېزونه - څوکۍ، د اوبو رسولو او لمريزې برېښنا سیسټمونه لري؛ په یو پوړ کې جوړه شوې ده.
د همدغه ودانۍ په جوړوېدلو ټولټال ۱۵ مېلیونه ۷۳۵ زره ۶۷۳ افغانۍ لګښت راغلی، چې د پوهنې یوې ملاتړ ادارې له خوا تمویل شوی دی.
د سیمې اوسیدونکو د یاد ښوونځي پر جوړېدو خوښي څرګنده کړه.
