په غزني ولایت کې د یو باب دیني مدرسې لپاره د بنسټ ډبره کېښودل شوه
د غزني ولايت مرکز اړوند په ده خدايداد سيمه کې «د مدینې» په نوم د ښځینه وو یوې دینې مدرسې لپاره د بنسټ ډبره، د یاد ولایت د پوهنې ریاست مشرتابه، ديني علماوو او قومي مخورو په حضور کې کېښودل شوه.
په پلان کې ده، یاده دیني مدرسه چې ۱۰ درسي ټولګي، یوه اداري څانګه او یو شمېر نور اړین ملحقات به ولري، په ۲ جرېبه ځمکه کې د ۲ میلیونه افغانیو په لګښت سره جوړه شي.
د پوهنې وزارت مشرتابه له پوهنیز نظام سره د خلکو په ځانګړې توګه د ده خدايداد کلي د اوسېدونکو له دوامداره همکاریو مننه او قدرداني کوي او دا يې د هغوی لپاره صدقه جاریه عمل وباله.
د غزني ولايت د پوهنې رئيس الحاج مولوي مير نصيراحمد حسيني په ويناء، د يادې ودانۍ په جوړېدو سره به شاوخوا ۴۰۰ تنو ماشومانو ته د زده کړې مناسب چاپېریال برابر شي.
