په فاریاب ولایت کې د ميش مست لومړني ښوونځي نوې ودانۍ ګټې اخيستنې ته و سپارل شوه
د فارياب ولايت پشتونکوټ په کلي کې د ميش مست مختلط لومړني ښوونځي د نوې ودانۍ جوړېدو چارې بشپړې او د يو لړ مراسمو په ترڅ کې ګټې اخيستنې ته وسپارل شوه.
د يادې ودانۍ د پرانيستلو مراسمو کې د پوهنې ریاست مشرتابه، د کلیو پراختیا، اقتصاد رئيسانو، علماوو، مشرانو، د زده کوونکو والدینو او د مرستندویه بنسټونو استازو ګډون درلود.
د فارياب پوهنې رئيس الحاج مولوي سيد حفيظ الله معتصم بالله د ښوونيزو بنسټونو د جوړولو پر اهميت خبرې وکړې او د اسلام د سپېڅلي دين له نظره يې د ښوونيزو بنسټونو جوړول خورا مهم وبلل.
دغه راز نوموړي د ښوونځيو او مدارسو جوړول د پوهنې د پرمختګ په برخه کې یو مثبت ګام وګاڼه، د هغو په ترمیم او ساتنه یې ټینګار وکړ.
ورپسې یو شمېر علماوو او مسئولینو هم خپلې ویناوې وکړې، د ټولنې په اصلاح او پرمختګ کې یې د علماوو رول مهم وباله.
د يادونې وړ ده، چې د ياد ښوونځي دغه نوې ودانۍ ۸ درسي ټولګي، ۱۵۲ پايې مېزونه او څوکۍ، يوه امنيتي خونه له نورو اړينو ملحقاتو سره لري، چې د يوه همکار بنسټ په مالي ملاتړ د ټولټال ۱ ميليون ۸۰۰ زره ۶۱۲ افغانۍ لګښت پرې راغلى دی.
