په هرات ولايت کې یو باب لومړنی ښوونځی تاسیس شو
د پوهنې وزارت د تګلارې له مخې د هېواد بچیانو لپاره د متوازنو ښوونیزو او روزنیزو چوپړونو د وړاندې کولو په موخه، داځل د هرات ولایت ګلستان ولسوالۍ اړوند په نوین محل کلي کې د ګلستان لومړنی ښوونځی تاسیس او پرانیستل شو
دیاد ښوونځي د پرانیستنې په مراسمو کې د دغه ولایت پوهنې ریاست مشرتابه، علماوو او د سیمه ییزه شورا غړو ګډون درلود.
د هرات پوهنې رئیس وويل، د ښوونیزو بنسټونو له تاسیسولو یې «په ځانګړې توګه په لرې پرتو سیمو کې» اساسي موخه، زده کړو ته د خلکو د لاسرسي لپاره د آسانتیاوو برابرول دي او په روان ښوونیز کال کې یې د نورو ښوونیزو او روزنیزو بنسټونو له جوړولو خبر ورکړ.
په ورته وخت کې د سيمې علماوو او قومي مخورو په خپله سيمه کې د ګلستان د لومړني ښوونځي په جوړېدو خوښي څرګنده کړه او د پوهنې د پراختیا په موخه یې د ياد ښوونځي د جوړېدو لپاره د پوهنې وزارت او د ياد ولايت د پوهنې رياست د مشرتابه له پاملرنې مننه وکړه.
