په هلمند ولایت کې د ۴۰ بابه ښوونځیو د ودانیو جوړولو او بیارغونې چارې پیل شوې
د پوهنې وزارت چارواکي وايي، د هلمند ولایت په بېلابېلو ولسوالیو کې د ۲۰ بابه ښوونځيو لپاره د نویو ودانیو جوړولو او د ۲۰ بابه نورو ښوونځيو د بیارغونې چارې پیل شوې.
په همدې مناسبت نن د هلمند پوهنې رئیس له لوري د ځایي مسئولینو او علماء کرامو په حضور کې د یو شمېر ښوونځيو (۲ بابه د بازار په مرکز، یو باب په نوزاد او یو باب دوسنګ کلي کې) د بنسټ ډبرې کېښودل شوې.
د پوهنې رئيس د معلوماتو له مخې، د همدغو ۴ بابه ښوونځيو د رغونې ټولیز لګښت ٤٢ مېليونه او ٢٩٦ زره افغانۍ اټکل شوى، چې د يو همکار بنسټ له لوري تمویلېږي.
د یادولو وړ ده، د همدغو ښونځيو هره ودانۍ به ۶ درسي ټولګي، یوه اداري خونه له ټولو اړینو ملحقاتو سره ولري.
عامو خلکو په خپلو سیمو کې د ښوونځیو له جوړېدو خوښي څرګنده او د ښوونیزو بنسټونو د رغولو او پراختیا په برخه کې یې د پوهنې وزارت د مشرتابه له پاملرنې مننه وکړه.
