په کندهار ولایت کې د یوې مدرسې د ودانۍ بنسټ ډبره کېښودل شوه
د کندهار ولایت په میوند ولسوالۍ کې د ۱۸.۷ مېلیونه افغانیو په لګښت د یوې دیني مدرسې (جامعة الاسلامیه) او یو محراب جومات بنسټ ډبره د پوهنې مسئولینو، دیني علماءکرامو، مدرسینو او مشرانو په حضور کې کېښودل شوه.
د مدرسې دغه ودانۍ چې ۴۰ درسي خونې، یو پخلنځی، د موټرو تمځای او ټولې اړینې اسانتیاوې به ولري، د سیمهییز خیرخواه محترم حاجي لالا په مالي مرسته د ۸ جرېبه ځمکې په ساحه کې په دوه پوړونو کې په عصري ډول جوړېږي، چې ورسره به په اودسخونه سمبال یو محراب جومات هم ولري.
د کندهار ولایت پوهنې چارواکو په وینا، د یادې مدرسې جوړولو کارونه به په ۱۵۰ کاري ورځو کې بشپړ شي.
د هېواد د پوهنې وزارت مشرتابه د پوهنیز نظام لپاره د عام ولس له مادي او معنوي ملاتړ څخه مننه کوي.
