پکتیکا ولایت کې ۲۱ بابه ښوونځي د لمریزې برېښنا په سیسټمونو سمبالېږي
د پکتیکا ولایت پوهنې ریاست خبر ورکوي، چې د تعلیمي خدمتونو پیاوړتیا لپاره به د مرکز او یو شمېر ولسوالیو په ۲۱ بابه ښوونځیو کې د ۲۶ مېلیونه افغانیو په اټکلي لګښت د لمریزې برېښنا سیسټمونه نصب او فعال شي.
یاد سیسټمونه به د پوهنې وزارت سره د یوې همکارې ادارې په مالي او تخنیکي همکارۍ جوړ شي او اساسي موخه یې د ښوونځیو په اداري او تدریسي څانګو کې د برېښنایي اسانتیاوو برابرول دي.
د پکتیکا پوهنې رئیس محترم مولوي عبدالوکیل خالد دغه پروژه یو مهم پرمختګ وباله او ویې ویل چې په یادو ښوونځیو کې د دغه سیسټم په فعالېدو سره به د یادو ادارو برېښنایي ستونزه حل شي.
د پوهنې ریاست د تخنیکي چارواکو په وینا، د ښوونځیو د اړتیاوو سره سم به د دې سیسټمونو ظرفیت ۵، ۷ او ۱۰ کیلو واټه وي.
په دې سیستمونو کې هایبریډ انورټرونه، د برېښنا ذخیره کولو بېټرۍ، لمریزې برېښنا تختې، سویچونه، څراغونه او نور تخنیکي وسایل شامل دي.
