د کابل ښار تاجور سلطانه لیسې زده کوونکو خپل کلتوري او ساینسي نندارتون پرانست
د پوهنې وزارت_کابل: دا نندارتون د کابل ښار پوهنې رئیس ډاکتر احمد ضمیر ګوارا او د پوهنې وزارت استازو په شتون کې پرانستل شو چې په دې نندارتون کې د تاجور سلطانه لیسې د زده کوونکو لاسي کارونه، ورزشي نندارې، تیاتر ته هم ځاې ورکړل شوۍ وو.
ډاکتر احمدضمیر ګوارا د ساینسي مضمونونو مختلفو برخو کې د یادې لیسې د زده کوونکو زحمتونه او لاسته راوړنې وستایلې او د دا شان نندارتونونو پرانستل يې د زده کوونکو وړتیاوو په پراختیا کې غوره وبللې او یادونه یې وکړه چې پوهنې وزارت په ځانګړې ډول د کابل ښار پوهنې ریاست به تل د دا ډول نندارتونونو په پرانستلو کې همکاري وکړي.
ګډون کوونکو په دې غونډه کې د دا ډول نندارتونونو له تر سره کیدو څخه خوښي وښوده او په کابل ښار او ولایتونو کې د ښوونځيو تر مینځ د دا ډول نندارتونونو د تر سره کیدو غوښتونکي شول او ټينګار یې وکړ چې دولت باید په دې برخه کې د تکړه او استعداد لرونکو زده کوونکو لپاره د عملي کار زمینه برابره کړي.
د دې غونډې په ترڅ کې د یادې لیسې د دولسم ټولګي زده کوونکو د خپل فراغت جشن ولمانځه چې په ویناوو او په زړه پورو نمایشاتو پاې ته ورسید.
