د پوهنې وزارت سرپرست وزیر په ارزګان ولایت کې په ښوونځیو کې د درسي کتابونو د وېش له بهیر څخه لیدنه وکړه
د پوهنې وزارت سرپرست وزیر محترم شیخ مولوي نورالله منیر د ارزګان ولایت ته د خپل کاري سفر په ترڅ کې په ښوونځیو کې د درسي کتابونو د وېش له لړۍ څخه لیدنه وکړه. نوموړي په همدې مناسبت د خپلو څرګندونو په ترڅ کې کتاب د تعلیمي نظام یو مهم عنصر یاد کړ، د کتابونو د توزیع د مسئولینو او کارمندانو هلې ځلې یې وستایلې او ژمنه یې وکړه چې د پوهنې وزارت به د کتابونو د چاپ او وېش په پروسه کې لازمې اسانتیاوې را منځ ته کوي.
د یادونې وړ ده، چې د کابل د فتحې را په دې خوا د نړۍ په دریو هیوادونو(متحده عربي اماراتو، چین او هندوستان) کې د الغریر، حنان او پیتامبرا شرکتونو سره د پوهنې وزارت د قرارداد په اساس، ۳۷میلیونه درسي کتابونه تر چاپ لاندې وو، چې د هغوی له جملې څخه ۱۶میلیونه د متحده عربي اماراتو او چین په هیوادونو کې چاپ شول، چې د کابل ښار او ولسوالیو په شمول د هیواد د مختلفو ولایاتو په ښوونځیو کې ووېشل شول او ځینې دوېش په حال کې دي او په نږدې راتلونکې کې به په هندوستان هیواد کې د چاپیدونکو کتابونو د چاپ او انتقال مراحل هم بشپړ او توزیع به یې پیل شي.
