په مرکز او ولایتونو کې د پوهنې خبرونه:

کاپیسا:
د کاپیسا ولایت د پوهنې ریاست د ساینس مرکز غړو د دغه ولایت د اله سای ولسوالۍ د حیات الله، سید آغا شهید، سید حسین شهید او سلطان خېلو لیسو له لابراتوارونو څخه لیدنه وکړه او هیله یې څرګنده کړه، چې د دغو لابراتوارونو له شته امکاناتو څخه دې په سمه توګه د زده کوونکو د سویې د لوړولو لپاره ګټه واخیستل شي.
کابل:
د کابل ولایت د ده سبز ولسوالۍ د پوهنې د ښوونیز څارنې آمرینو له خپل یوه پلاوي سره د دې ولسوالۍ د ښوونځیو د څارنې په جریان کې د ښوونځیو د شورا له غړو سره د لیدنې پر مهال د یادو ادارو له مسوولینو وغوښتل چې له کتابتون، لابراتوار او نورو اسانتیاوو څخه په دغو ښوونځيو کې د زده کوونکو د ښې زده کړې لپاره  ډېره ګټه پورته کړي.
په یو بل خبر کې:
د کابل ولایت د پوهنې ریاست د مسؤلینو د غوښتنې پر بنسټ، شفیق الله ناصري د استالف ولسوالۍ د پوهنې د ښوونیز څارنې د آمر په توګه او د استالف د ښوونیز څارنې مخکنی آمر مولوي حزب الله حقاني د شکردرې ولسوالۍ د ښوونیز څارنې د آمر په توګه معرفي او په کار یې پیل وکړ.
غزني:
د غزني ولایت د پوهنې رئیس مولوي محمد منیر منصور په دغه ولایت کې د پاملرنې موسسې له مسوولینو سره وکتل.
 د غزني د پوهنې رئيس له يادې ادارې سره د هر ډول مرستو د ژمنې په ترڅ کې د دغه ولايت د پوهنې په برخه کې ټولې ستونزې او اړتياوې د يادې ادارې له مسوولينو سره شريکې کړې او په دې برخه کې يې د هغوى د پاملرنې غوښتنه وکړه. چې د هغوی له خوا د تایید وړ وګرځېده.
خوست:
په خوست ولایت کې د یونیسف دفتر په دغه ولایت کې د ۱۲ ښوونځيو ودانۍ جوړوي. په همدې موخه د خوست د پوهنې رياست د غونډو په تالار کې د دې رياست مسوولينو د پوهنې له مسوولينو او ځايي خلکو سره غونډه وکړه او له هغوى يې وغوښتل، چې د دې پروژې د پرمختيا او اغېزمنتيا په برخه کې له يونيسف سره مرستې وکړي.
هرات:
د هرات ولايت د پوهنې رئيس مولوي شهاب الدين ثاقب په هرات کې د افغان ترک لېسې له علمي، فرهنګي او ښوونيز نندارتون څخه د ليدنې په ترڅ کې د يادې لېسې د زده کوونکو د نوښتونو د ستاينې په ترڅ کې یې وويل، چې د دا ډول نندارتونو جوړېدل د زده کوونکو د علمي سویې د لوړولو لپاره ډېره مرسته کوي.