د پوهنې وزارت د بشري سرچینو او اداري پراختیا لوی رئیس، د کندز ولایت له مسئولینو سره وکتل
د پوهنې وزارت د بشري سرچینو او اداري پراختیا لوی رئیس مفتي محمد یوسف ثاقب، د ولایتي سفرونو په لړۍ کې، دیاد وزارت د کړنلارو، په ځانګړې توګه د دیني مدارسو د نوي تشکیلاتي جوړښت تطبیق په موخه، کندوز ولایت ته سفر وکړ. د پوهنې وزارت پلاوي د کندوز ولایت پوهنې رئیس، د خلکو یو شمېر استازو، د ملکي او نظامي سکتورونو له مسئولینو سره وکتل.
په دې کتنه کې چې د کندز له والي او مرستیالانو سره یې درلوده، د دیني مدارسو د ستونزو په ګډون یې پر ښوونیز او روزنیز وضعیت خبرې وکړې او د یادو ادارو نویو بستونو لپاره یې د وړ نوماندانو ګمارلو په اړه تفصیلي بحثونه وکړل.
له ښوونیزو بنسټونو او مدارسو څخه د پوهنې وزارت جګپوړي پلاوي د لیدنو په ترڅ کې، د پوهنې وزارت د بشري سرچینو او اداري پراختیا لوی رئیس، د کندز ولایت په دشت ارچي ولسوالۍ کې د اصحاب الصفه مرکزي دارالایتام ته ولاړ او هلته یې له مسئولینو او ماشومانو سره له نیږدې وکتل.
نوموړي په يادو ناستو کې د مدارسو او دارلایتامونو د کره احصايې راټولولو لارښوونه وکړه او د یاد ولايت پوهنې رياست مشرتابه او کارکوونکو ته يې د اداري چارو او تشکيلاتي جوړښت د تطبيق په برخه کې يو ښوونيز سيمينار دایر کړ.
