د هېواد دینی مدارسواو دارالحفاظونو لپاره د پوهنې وزارت د اسلامي زده کړو معینیت د بستونو وېش کمېټې کاري غونډه وکړه
د پوهنې وزارت د اسلامي زده کړو معین الحاج مولوي کرامت الله آخندزاده په مشرۍ، د دیني مدارسو او دارالحفاظونو لپاره د بستونو د وېش کمېټې مشورتي غونډه، د یاد وزارت د یو شمېر مرکزي رئیسانو په ګډون جوړه شوه.
په پيل کې د پوهنې وزارت د اسلامي زده کړو معین د هېواد دیني مدارسو او دارالحفاظونو لپاره د بستونو د وېش د معیارونو په تړاو خبرې وکړې او په یاده برخه کې یې له مسئولینو څخه د جدي پاملرنې غوښتنه وکړه، تر څو د مدارسو او دارالحفاظونو اړتیاوو ته په کتلو سره لازم تصمیمونه ونیول شي.
دغه راز نوموړي له مسئولينو وغوښتل، تر څو د مدارسو او دارالحفاظونو لپاره د ضرورت وړ خالي بستونه د هغوی د غوښتنو او اړتیاوو په پام کې نیولو سره سم و وېشي.
دغه راز په یاده غونډه کې د يوشمېر هغو مدارسو په اړه چې تر اوسه په ولايتونو کې رسمي نه دي، مفصل بحثونه وشول او لازم تصميمونه ونيول شول.
