د ولایتونو د ښوونکو مسلکی پراختیا د خالي کادري بستونو ډکولو لپاره له ۵۰۰ تنو نوماندانو رقابتي آزموینه واخیستل شوه
د پوهنې وزارت د ښوونکو د مسلکي پراختیا او ښوونیز نصاب لوی رئیس مولوي اول ګل ایوبي او نورو مسئولینو په حضور کې د ولایتونو د ښوونکو د مسلکي پراختیا کادري بستونو ډکولو په موخه، له ۵۰۰ تنو نوماندانو څخه رقابتي آزموینه واخیستل شوه.
په پیل کې د پوهنې وزارت د ښوونکو مسلکي پراختیا او ښوونیز نصاب لوی رئیس د استعدادونو د ارزونې په برخه کې د آزموینو اهمیت ته په اشارې سره وویل: له دغو رقابتي آزموینو څخه اساسي موخه، مسلکي، تجربه لرونکو او با استعداده کادرونو ته د مسئولیتونو سپارل دي، تر څو له دې لارې وکولای شو، د پوهنیز نظام کیفیت کچه لوړه کړو.
ورپسې د پوهنې وزارت د ښوونکو د مسلکي پراختیا رئیس هم د یادې آزموینې د پروسې په اړه معلومات وړاندې کړل او ګډون والو ته یې د بشپړې روڼتیا او عدالت ډاډ ورکړ.
