پکتيا ولايت کې د یو باب لومړني ښوونځي نوې ودانۍ پرانیستل شوه
د پکتیا ولایت پوهنې رئیس مولوي عبدالقیوم فاروقي، د یاد ولایت په سید کرم ولسوالۍ کې د بوکر لومړني ښوونځي ودانۍ پرانیسته. د دغه ښوونځي د پرانيستې په مراسمو کې د پوهنې پر مسئولينو سربېره، د سيمه ييزو ادارو استازو او د يادې ولسوالۍ يو شمېر قومي مخورو هم ګډون درلود. د پوهنې رئيس د يادې ودانۍ د پرانیستې پر مهال وويل، دغه لومړنی ښوونځی د پوهنې په برخه کې د يو خيريه بنسټ په مالي مرسته جوړ شوی، چې له ټولو اړینو ملحقاتو سره ۸ درسي ټولګي لري. د سيمې خلکو د یاد ښوونځي په جوړېدو خوښي څرګنده کړه.
