په لوګر ولایت کې د ۲۱،۹ مېلیونه افغانیو په لګښت د ۴ بابه ښوونځیو بیارغونې چارې بشپړې شوې
د لوګر ولايت پوهنې رياست د خبرپاڼې له مخې: د یاد ولايت په مرکز پل علم ښار کې د ملک شير احمد کوچي او شلوک او په بره کي برک ولسوالۍ کې د مومندو او شيخانو ښوونځيو د ترمیم او بیارغونې چارې د یو همکار بنسټ په همکارۍ د ۲۱،۹ مېلیونه افغانیو په لګښت بشپړې او ګتې اخیستنې ته وسپارل شول.
د يادو پروژو د پرانیستنې په مراسمو کې د پوهنې رئيس الحاج عبدالرحمن حميدي، مسئولينو، د ولایت مقام مرستیال مولوي محمد انور دين پرور، یو شمېر دیني علماءکرامو، فرهنګیانو او قومي مخورو حضور درلود.
د پوهنې مسئولينو د معلوماتو له مخې: د يادو بنسټونو د بيارغونې په پروژو کې د احاطوي دېوالونو جوړول، د پاکو اوبو څاګانو کيندل، د لمريزې برېښنا د سيسټم نصبول، د ښوونځيو د انګړ کانګرېټ کول او داسې نور شامل دي.
مسئولینو په خپلو خبرو کې د هېواد د ماشومانو لپاره د پوهنې وزارت پراختیايي پلانونو ته په اشارې سره، د زده کړو په برخه کې د لازیاتو آ سانتیاوو د برابرولو ډاډ ورکړ.
له بلې خوا د سیمې اوسیدونکو د هېواد بچیانو ته دزده کړو د آسانتیاوو برابرولو په برخه کې، د پوهنې وزارت د مشرتابه او مسئولینو له هلو ځلو مننه او قدرداني وکړه.
