د پوهنې وزارت دعوت او ارشاد ریاست له لوري د کابل ښار پوهنې رياست مبلغينو لپاره اصلاحي او تربيتي سيمينار پرانیستل شو
د پوهنې وزارت دعوت او ارشاد ریاست له لوري د کابل ښار پوهنې رياست مبلغينو لپاره یو ورځنی اصلاحي او تربيتي سيمينار، د یاد وزارت د کیفیت تضمین معین الحاج مولوي عبدالخالق صادق، د سرچینو او ادارې معین الحاج مولوي صبغت الله وصیل، ځینو مرکزي رئیسانو، مسئولینو او مبلغینو په حضور کې جوړ شو.
په پیل کې د پوهنې وزارت د سرچینو او ادارې معین مبلغینو او مېلمنو ته د ښه راغلاست ترڅنګ، د دعوت او ارشاد د موخو او په ټولنه کې یې د مثبت اغېز په تړاو مفصله ویناء وکړه.
ورپسې د یاد وزارت د کیفیت تضمین معین د خپلو خبرو په ترڅ کې، د مبلغ لپاره تر ټولو مهم شرایط د نیت اصلاح، خپل نفس سره محاسبه او د الله تعالی رضا حاصلول وبلل.
نوموړي څرګنده کړه، موږ ته اوسمهال تر ټولو مهم مسئولیت راسپارل شوی، کوم چې د دیني او شرعي مسایلو بشپړ تطبیق دی.
د کیفیت تضمین معین د وخت ارزښت ته په اشارې سره زیاته کړه، چې د پوهنې وزارت ټول منسوبین مکلف دي، تر څو خپلې دندې په ټاکلي وخت ترسره او خپل ديني او ملي وجایب اداء کړي.
په ورته مهال يو شمېر نورو جیدو علماءکرامو هم د دعوت او ارشاد مبلغینو او منسوبینو ته اغېزناکې ویناوې وکړې او هغوی یې خپلو اساسي مسئولیتونو ته متوجې کړل.
غونډه دعائیې په لوستلو سره پای ته ورسېده.
